Events News

08 May

Minisitiri w’Intebe, Dr Ngirente, yihanganishije imiryango yaburiye abayo mu biza bimaze iminsi byibasira uduce mu rwanda

Written by 

Mu muhango wo gushyingura abantu 18, wabereye i Karongi kuri uyu wa 8 Gicurasi 2018,

Minisitiri w’Intebe, Dr Edouard Ngirente, yavuze ko Leta ifite inshingano zo kwita ku Banyarwanda ndetse ku bagizweho ingaruka n’ibiza bigomba kuba umwihariko.

Yagize ati “Ubutumwa ngiye kubagezaho ni ubwo kubafata mu mugongo. Muzi ko tumaze amezi atatu arenga turi mu bihe by’ibiza, imvura nyinshi irenze iyo twakabaye twiteguye mu mezi nk’aya. Iyo mvura ikaba yarangije ibintu byinshi mu gihugu cyacu no mu karere kacu inahitana ubuzima bw’abantu. Ikitugenza ni ukugira ngo tubafate mu mugongo ariko dufashe no mu mugongo Abanyarwanda bose.”

Minisitiri w’Intebe, Dr Ngirente n’abandi bayobozi ba Leta banaremeye abaturage bo muri Karongi bahuye n’ibiza babagenera ibahasha y’amafaranga ibihumbi 50 Frw yo kugura buji n’ibikoresho by’ibanze byo mu rugo birimo amasafuriya, ibiryamirwa n’iby’isuku.

Dr Ngirente yababwiye ko ubutumwa yahawe na Perezida Kagame ari uko Leta izakomeza kuzirikana no gufata mu mugongo abana bayo mu bihe by’ibiza no mu bisanzwe.

Yakomeje abasaba umusanzu mu kwirinda ibyago biterwa n’ibiza bava mu manegeka.

Ati “Leta izakomeza kubafasha mu ngamba z’igihe cyihuse n’iz’igihe kirekire. Leta irakomeza ibafashe ariko dukeneye ko namwe mudufasha kugira ngo igikorwa cyo gutabara abantu cyihute. Ubutabazi tubasaba ni ubwo kugira ngo abandi batuye ahashobora gutenguka igihe icyo aricyo cyose, twabibonye ko imisozi yagiye imanuka tugerageze kubimura tubashyire ahantu hari umutekano, imvura idashobora kubangiriza ubuzima.”

Minisitiri w’Imicungire y’Ibiza no gucyura Impunzi, De Bonheur Jeanne D’Arc, yavuze ko igihugu kitishimiye gukomeza gutakariza abantu mu biza kandi hari ibyo nabo bashobora gukora mu kubikumira.

Bimwe mu byo abantu bashobora gukora mu gukumira ibiza harimo guca amaterasi n’imirwanyasuri, gufata amazi yo ku nzu, kwirinda gutura mu manegeka n’ibindi.

Kantarama Caritas waburiye abe mu bahitanywe n’ibiza i Karongi, yashimiye ubuyobozi kuba bwabazirikanye bukabafata mu mugongo n’abaturanyi bakoze uko bashoboye bagacumbikira bagenzi babo basizwe iheruheru.

Mu gihe hakiri ubwoba ko umubare w’ibyangizwa n’ibiza ushobora kwiyongera kubera imvura ikomeje kugwa, Minisiteri y’Ubutegetsi bw’Igihugu yatangaje ko yafashe ingamba zo kwimura abantu mu manegeka, bagatuzwa ahantu hadashyira ubuzima bwabo mu kaga.

Imibare imaze gukusanywa yagaragaje ko ibiza byibasiye Karongi byahitanye abantu 18, inzu 29 zirengerwa n’inkangu, mu gihe abantu barindwi bakomeretse kuri ubu bari kwitabwaho kwa muganga.

Minisitiri w’Intebe, Dr Ngirente Edouard, yifatanyije n’abaturage b'i Karongi gushyingura abantu 18 bahitanywe n’inkangu
Abahuye n'ibiza muri Karongi bahawe ibikoresho by'ibanze byo gukoresha
Bamwe mu bagize imiryango y'abitabye Imana bashyira indabo ku mva za ba nyakwigendera
Minisitiri De Bonheur Jeanne D’Arc ashyikiriza umwe mu baturage ibahasha irimo amafaranga yo kwifashisha hagurwa ibikoresho by'ibanze byo mu rugo
Abaturage bo mu Murenge wa Rwankuba bafashe mu mugongo imiryango yaburiye abayo mu biza
Uhereye ibumoso: Minisitiri w’Intebe, Dr Edouard Ngirente; Minisitiri w'Ubutegetsi bw'Igihugu, Kaboneka Francis; Guverineri w'Intara y'Uburengerazuba, Alphonse Munyantwari n'Umunyamabanga wa Leta muri Minisiteri y'Ibikorwaremezo Ushinzwe Gutwara abantu n'Ibintu, Uwihanganye Jean de Dieu, bifatanyije n’Abanyakarongi gushyingura abantu 18 bahitanywe n’inkangu
Abayobozi mu nzego zitandukanye batabaye imiryango yaburiye ababo mu biza
Read 70 times
Rate this item
(0 votes)

Leave a comment

Make sure you enter all the required information, indicated by an asterisk (*). HTML code is not allowed.

Events venues

Contact Address

Ibirori.rw

Boulevard de l’Umuganda, Kacyiru, Kigali, Rwanda

Phone: +250728716490

Email: info@ibirori.rw

About IBIRORI

We are the home of all event announcements.

Feel free to come and join us so that we can make dreams come true.